1. |
A Crespa de Santo André
02:01
|
|||
conto esta historia
para que non marche a inxenuidade de crela esluída no ar
coma o rastro do fume escuro dos foguetes
nas mañás da Festa de San Lourenzo sobre o fondo craro de Comesaña
a ela
que me vertebrou a fala e a imaxinación
e me aprendeu a maldade espida entre ortigas e fume de restrollo
puxémoslle música electrónica
e luces rosas estroboscópicas
por enriba dos recordos e as hortensias
estaba tamén naquela rave ás 6 da mañá
dando de comer ás pitas
e gardando o amencer que xa nunca lle sairía
ela
que fixou a idade en que fun adulta
para ensinarme o odio e a rabia contida
o desprezo cara a ser muller nun aceno
e que nunca terei ese sorriso manso
dos animais domesticados
que máis ben
gardo no fondo do ollo dereito un brillo cruel
como de vaca
coa mirada fixa
xusto antes de escornar
ou de gata ferida lambendo o sangue alleo das gadoupas
destas unllas aguzadas con paciencia coas que rabuñaría na morte
avoa
para traerte de volta coas mans conxeladas
a boca húmida e un arrecendo a frores
entre o fume do restrollo
esluíndote para sempre
coma o rastro dun foguete
na mañá da Festa de San Lourenzo
sobre ceo crarísimo de Santo André de Comesaña
|
||||
2. |
Rezo por ti
03:05
|
|||
volvo sempre a aquela mañá de xaneiro
e estampo o coche contra o farol da universidade
mido
matemática
cal é a velocidade exacta
para escachar o parabrisas
para que cando menos
o cinto de seguridade
se crave no lado esquerdo do pescozo
e faga ferida e sangue e cicatrice
volvo tamén a aquela noite
coma un presaxio
coma quen dá con esa rabuñada nova
no coche
na defensa dereita de atrás
canda a luz de freo
brillante e escura
abríndose paso
na carrozaría gris perla
que eu aínda penso nova
despois de vinte anos
e sei que eu non puiden facela
eu
que son lenta para todo
manteño as distancias
e aparco con tino
que desde que me estampei contra todo
meto primeira
en todos os parking
manobro de cu en batería
e agardo a ver tan só un dos faros
do coche aparcado
vou cun pé
sempre
no freo
porque eu son lenta para todo
ata para decatarme de que esa rabuñada
estivo sempre aí
ben á vista de calquera
e así
brillante e escuro
apareceu
este desexo
de asasinarte
porque ás veces
cando estou soa
rezo por ti
non é rezar exactamente
senón máis ben unha forma
de mirar polo resto
que me aprenderon de nena
pido
por exemplo
que esvares na ducha
que non che actualice o whatsapp
que polas mañás
as fiestras do coche
se che empanen tanto
que non poidas arrancar
que se che esgote o espazo
de almacenamento interno
do dispositivo móbil
que vaias cortar as unllas dos pés
cortes tamén o padrasto
do dedo maimiño
e te desangres
na soidade
do bidé
cousas pequenas
diminutas
ínfimas
que nin ti
nin ninguén
poida nunca
poñer en relación comigo
pero que pouco a pouco
te maten
|
||||
3. |
||||
hai corpos
coma o meu
aos que lles hai que aprender a loita
pase o tempo que pase
abrazarei sempre a fraxilidade
ese medo de non ser bonita
ao voso xeito
das bragas sucias
os caixóns desordenados
e o armario desfeito
devolvereime testuda
esa capacidade de sacar fóra
todo o que me apodrece
vendo como esta rabia
que tanto nos comprime
desde o estómago á gorxa
aínda nos deixa sen voz
se me preguntan
pediría de novo
aprenderme a vomitar
todo este medo
este odio que se me acumula
no brando do esterno
no único lugar que non poderedes
traspasar
nunca
para ferirme
porque aquí dentro
nesta gándara de soños que eu protexo
a miña mamá baila
nunha cociña repleta
de arriba a abaixo
de louza sen fregar
as avoas cantan
dan palmas
comen centos de cacahuetes
e tiran as cascas polo ar
aquí
nacemos tortas
enrevesadas
fartas de aturar o peso
que nos bota enriba a sociedade
nacemos mudas e fartas de tanto silencio
xuntas deprendémonos a berrar
así que a vós
que calades
deséxovos fillas poetas
fillas silenciadas
ninguneadas
fillas ignoradas
fillas ás que ninguén dirixa a palabra
polos corredores da facultade
por críticas
por teren unha opinión
a vós que calades todo ata a tolemia
deséxovos fillas que critiquen as políticas que vós votades
que saian a rúa
queimen os periódicos
denuncien
e enchan as redes sociais de bromas estúpidas que ninguén entenda
porque o único cárcere que existe para nós
é o silencio imposto
e tamén porque coñecemos a historia
e estamos
aprendendo a ladrar no verso de Olga Novo
contra o amo que non só non nos dá de comer
senón que nos afasta ás unhas das outras e que nos marxina
non deixaremos
nós
de buscar a palabra que máis doia
para cravárvola xusto no centro da conciencia
coma unha bomba
agardando pacientes a que vos estoupe
e ata ese día en que paredes
de encubrir co voso silenzo a maldade
a vós que calades
deséxovos fillas poetas
|
||||
4. |
Vil - xoliña 2020
01:49
|
|||
Noite de paz, noite de amor
todo dorme derredor
entre os astros
que espallan a súa luz
está Rodolfo o reno,
que tiña o nariz vermello,
e dun brillo singular
do que a xente ría sen parar.
O noso amigo Rodolfo
triste e só quedou,
pero o nadal chegou
e Nuria Vil baixou
cara a Belén cunha burra, rin, rin
eu remendábame, eu remendeime
eu fixen un remendo
e logo eu quiteino
cargada de chocolate
co branco nadal soño
e coa neve ao meu redor
branca é a miña quimera
e a mensaxe de paz,
de puro amor.
Recordar a túa infancia poderás,
cando chegue o branco nadal
(aínda que non vises nevar na túa vida
porque a túa cidade está a nivel do mar,
pero o teu imaxinario do nadal
estea tan influenciado pola cultura anglosaxona
e estranxeira que che custe visualizar
unha postal de nadal sen neve…).
OH BRANCO NADAL!
Soño coa neve ao meu arredor
e Belén, campás de Belén!
As anxiñas tocan,
que novas van traer?
O camiño que leva a Belén
baixa ata o val que a neve anegou.
As pastoras e pastores
queren ver ao seu rei,
pero por primeira vez
pensan no cisheteropatriarcado
e non poñen xénero
ropopompom ropopompom.
A todes quero deservos, sempre,
Felicidade que é un gran presente.
É o intre de que gocemos!
Moita paz, vide a cantar!
Bo nadal! Bo nadal!
|
Nuria Vil GA, Spain
volvo sempre
coma o allo a cebola e a candidiase
#PalabraFalada #PoesíaOral #SpokenWord
Streaming and Download help
If you like Nuria Vil, you may also like:
Bandcamp Daily your guide to the world of Bandcamp